Dili, 10 Novembru 2021- Sekretária Estadu Formasaun Profisionál no Empregu, liu-husi Diresaun Nasionál Empregu Exteriór ne’ebé servisu hamutuk ho KSLP (Korean Student Language Program), anunsia naran joven Timor-oan ne’ebé tuir ona teste atú tama kursu lian korea iha HRD korea EPS Center Bekora.

Iha intervista Diretór Diresaun Nasionál Empregu Exteriór Filomeno Soares hateten, Sekretária Estadu Formasaun Profisionál no Empregu liu-husi Diresaun Nasionál Empregu Exteriór ne’ebé servisu hamutuk ho KSLP Korea, tinan-tinan sempre halo rekrutamentu ba Timor-oan sira ne’ebé iha interese hakarak tuir kursu lian korea, iha eskola lian korea bekora.

Tanbá ne’e iha tinan 2021 Timor-oan ne’ebé tuir teste atu tama kursu lian korea hamutuk ema na’in 5492, kompostu husi feto 842 no mane 4650, husi kandidatu hirak ne’e tuir teste, rezultadu hatudu ema na’in 2023 maka pasa, kompostu husi feto na’in 277 no mane 1746.

Diretór ne’e esplika, teste ne’ebé realiza SEFOPE liu-husi DNEE fasilita de’it, maibé ba prosesu selesaun to’o fó sai naran ne’ebé, liu no lá-liu ne’e ajensia KSLP husi Korea maka responsabiliza.

Nia afirma ba kandidatu sira ne’ebé liu sei fahe ba faze rua, faze dahuluk sei hahú tama kursu iha loron 24 novembru 2021, no faze daruak sei hahú kursu iha fulan agustu 2022, ho durasaun kursu fulan neen.

Media,

LSU, DNEE, Becora, Dili