Dili, 06 Dezembru 2021- Sekretáriu Estadu Formasaun Profisionál no Empregu liu-husi Diresaun Nasionál Empregu Exteriór haruka tán traballadór Timoroan na’in neen-nulu-resin-lima (65) ba servisu iha Korea Súl.

Iha intervista Diretór Diresaun Nasionál Empregu Exteriór Filomeno Soares hatete, ohin Governu Timor-Leste liu-husi SEFOPE marka tán história ida hodi haruka traballadór Timoroan na’in neen-nulu-resin-lima (65) ba servisu iha Korea Súl, ba dá-haat iha tempu KOVID-19.

Diretór ne’e agradese ba Governu Korea Súl, tanbá iha tempu KOVID-19 nia laran maibé, nafatin iha komitmentu hodi simu traballadór Timor-oan sira atu ba servisu iha sira nia rain.

Dirizente ba Diresaun Nasionál Empregu Exteriór ne’e mós hato’o nia mensazen ba traballadór sira katak, ba servisu iha ema nia rain atu labele ses aan husi sistema, nune’e fasíl ba governu atu bele kontrola.

Entretantu traballadór Timor-oan na’in neen-nulu-resin-lima (65) ne’e mane hotu, no sei ba servisu iha área peskas na’in haat-nulu (40), no área fábrika ema na’in rua-nulu-resin-lima (25).