Dili, 13 Dezembru 2021- Sekretáriu Estadu Formasaun Profisionál no Empregu liu-husi Diresaun Nasionál Empregu Exteriór ohin haruka tán traballadór Timor-oan re-entri na’in rua-nulu-resin-tolu (23) ba servisu iha Korea Súl.

Iha intervista Diretór Diresaun Nasionál Empregu Exteriór Filomenu Soares hateten, ohin Governu Timor-Leste liu-husi SEFOPE haruka tán joven Timor-oan na’in rua-nulu-resin-tolu (23) ba servisu iha Korea Súl, área peskas na’in sanulu-resin-haat (14) no área fábrika ema na’in sia (9) mane hotu.

Diretór ne’e esplika traballadór Timor-oan na’in rua-nulu-resin-tolu (23) ne’e, hanesan traballadór re-entri, katak traballadór ne’ebé ba ona servisu iha Korea Súl hatudu komportamentu ne’ebé di’ak, kontratu remata fila mai Timor-Leste, no agora sira nia kompaña husu atu sira bele fila ba kontinua servisu.

Tanbá ne’e Diretór ne’e alerta ba traballadór Timor-oan sira ne’ebé ba servisu iha Korea-Súl, atu hatudu nafatin komportamentu servisu ne’ebé di’ak, la-bele ses a’an husi sistema nune’e Governu fasíl atu bele kontrola.

Entretantu iha tinan 2021, Sekretáriu Estadu Formasaun Profisionál no Empregu liu-husi Diresaun Nasionál Empregu Exteriór haruka ona Timor-oan na’in, atus-rua-tolu-nulu-resin-rua (232) ba servisu iha Korea Súl, kompostu husi área peskas atus-ida-lima-nulu-resin-neen (156) no área fábrika hitu-nulu-resin-neen (76).