Dili, 03 Dezembru 2021- Diretór Diresaun Nasionál Empregu Exteriór Filomeno Soares, hamutuk ho Diretór Jerál Formasaun Profisionál no Empregu Paul Alves, Xefe Gabinete interinu SEFOPE Agusto de Jesus Alves, reprezentante kompaña airline, hala’o enkontru ho família traballadór Korea Súl nain 65 iha salaun SEFOPE Bekora.

Iha biban ne’e Diretór Diresaun Nasionál Empregu Exteriór Filomeno Soares hateten, objektivu husi enkontru ne’e, simplesmente atu konvida traballadór sira nia família, mai asina deklarasaun ho governu atravesa liu-husi SEFOPE, nune’e bele iha hotu responsabilidade ba traballadór sira.

Diretór ne’e esplika ba família traballadór katak, deklarasaun ne’ebé ohin ita asina signifika katak ita prontu atu husik, ita nia oan, ka ita nia kaben sai husi ita nia sorin hodi ba servisu iha Korea Súl, nune’e karik mosu problema ruma liu-husi ita nia hakarak, parte rua iha hotu responsabilidade hodi rezolve.

Nia afirma governu kria de’it kondisoens atu haruka Timor-oan sira ba servisu iha ema nia rain hodi manan ema nia osan no mós bele aprende ema nia matenek iha nasaun seluk, nune’e fila mai bele diversifika ekonomía família no nasaun, la’os atu ba servisu permanenti.

Tempu hanesan dirizente ba Diresaun Nasionál Empregu Exteriór ne’e husu ba família traballadór sira katak, karik ita nia oan ka ita nia la’en haruka osan mai, atu utiliza ho didi’ak, tanbá antes hetan osan, sira hasoru servisu ne’ebé todan tebes.

Entretantu traballadór na’in neen-nulu-resin-lima (65) ne’e, kompostu husi área peskas ema na’in rua-nulu-resin-lima (25) no área fábrika ema na’in haat-nulu (40), ne’ebé tuir planu sei aranka ba servisu iha Korea Súl iha loron 6 Dezembru 2021.