Dili, 14 Dezembru 2021- Sekretáriu Estadu Formasaun Profisionál no Empregu liu-husi Diresaun Nasionál Empregu Exteriór realiza teste eskrita lian ingles ba kandidatu traballadór SWP (Seasonal Worker Program) Munisípiu Dili ni’an, iha salaun INFORDEPE Balide.

Iha serimónia ne’e Diretór Diresaun Nasionál Empregu Exteriór Filomeno Soares hateten, objektivu husi teste ne’e atu bele kompleta selesaun kandidatu traballadór SWP Munisípiu Dili ni’an, ne’ebé halo ona iha tinan kotuk, hodi tuir prosedimentu legál ne’ebé hatur ona katak teste ba Austrália fiziku no lian ingles.

Nia afirma, prosesu teste ne’e sei la deskualifikadu ema ida, maibé prosesu teste lian ingles ne’e atu hodi hatene kandidatu traballadór sira nia nivél koñesimentu lian ingles iha klasifikasaun A, B ká C.

Tanbá ne’e, Diretór ne’e alerta ba kandidatu traballadór sira katak, iha prosesu teste ne’e atu nafatin mantein disiplina, hodi priense ho didi’ak, tanbá atu hetan valor A, B no C ida-idak maka desidi, ekipa SEFOPE liu-husi DNEE só fasilita de’it.

Tempu hanesan dirizente ba Diresaun Nasionál Empregu Exteriór ne’e hato’o nia mensazen ba kandidatu traballadór sira, mantein buka informasaun atu bele disidi ita boot sira nia aan, no kuidadu saude, tanbá atu ba servisu iha austrália persiza ema ne’ebé la iha moras.

Entretantu kandidatu traballadór ne’ebé atu tuir teste lian ingles hamutuk ema na’in, rihun-tolu-atus-hitu-sanulu-resin-haat (3714), kompostu husi mane rihun-rua-atus-neen-lima (2605) no feto ruhun-ida-atus-ida-sia (1109), ne’ebé sei tuir teste durante loron tolu.