Díli 26 de Outubru 2021- Sekretáriu Estadu Formasaun Profisionál no Empregu liu-husi Diresaun Nasionál Empregu Exteriór ne’ebé servisu hamutuk ho HRD husi Korea Súl, iha estadion Munisipál Dili, halo’o teste eskrita ba jovens Timor-oan na’in 5492 ne’ebé hakarak tuir kursu lian korea iha sentru formasaun lian Korea Bekora.

Iha biban ne’e Diretór Diresaun Nasionál Empregu Exteriór, Filomeno Soares hateten iha tinan 2020 SEFOPE labele hala’o aktividade hodi prepara ita nia joven sira atu ba servisu iha Korea Súl tanbá mundu infrenta hela moras surtu KOVID-19, maibé iha tinan ida ne’e ita haree moras ida ne’e komesa reduz, nune’e maka ita hahú rekruta fila-fali hodi prepara sira ba kursu lian korea.

Kompostu husi joven rihun-lima-atus-ha’at-sianulu-resin-rua (5492) ne’e, mane rihun-ha’at-atus-neen-lima-nulu (4650) no feto atus-ualu-haat-nulu-resin-rua (842), ne’ebé sei tuir teste hahú iha loron 26 to’o 27 Outobru 2021.

Diretór ne’e mós afirma tuir SEFOPE ninia tarzetu ba joven hirak ne’ebé tuir ezame atu liu hamtuk ema na’in rihun-rua-atus-lima (2500), tanbá ne’e husu ba sira ne’ebé la pasa iha teste ne’e atu labele lakon vontade, maibé esforsu nafatin hodi he’in oportunidade tuir mai, no mós bele ba tuir formasaun iha sentru formasaun sira seluk ne’ebé hanorin lian korea.

Nia husu mós ba jovens sira atu labele gasta tempu ba hemu tua no festa, maibé husu atu hakbesik aan ba sentru formasaun sira hodi buka informasaun nune’e bele foti desizaun ba sira nia aan, tambá nasaun ne’e presiza ema matenek hodi bele kontribui ba dezenbolvimentu rai doben Timor-Leste.

SEFOPE-DNEE

Becora, Dili