AVISU

Governu Timor-Leste liu husi Ministeriu da Saude konsidera katak simu vassina kompletu (dala rua) hanesan dalan néebé diak hodi proteje Timoroan sira hodi kontra virus COVID-19. Vassinas néebé hetan ona aprovasaun husi Ministeriu da Saude Timor-Leste nian maka AstraZeneca ho Sinovac.

No mos, atu bele hetan oportunidade servisu iha Australia iha futuru, dalan ida maka simu vassinasaun néebé aprovadu husi Governu Australia; vassina née maka AstraZeneca.

Nunée rekomendasaun husi DNEE maka traballador hotu-hotu simu vassina AstraZeneca dose rua (2), tamba ida née sei fó vantajem bóot ba imi kompara hó traballador sira néebé seidauk vassina. Maibe desizaun final atu hili imi ka lae atu ba serviu iha Australia sei depende barak ba Empregador nia nesesidade.

Hó ida née DNEE presiza atualiza dadus traballador ne’ebé hetan ona vassina iha sistema atu asegura katak traballador sira néebé sei oferese atu ba servisu iha Australia protegidu husi COVID-19. Tamba née, DNEE hakarak informa ba kandidatu traballador SWP ho PLS hotu katak:

1. Karik kandidatu traballador balun ne’e be konsege simu ona vassinasaun tipu Sinovac iha fulan hirak liu ba DNEE konsedeira maibe hahu husi 15 julho ba oin DNEE rekomenda traballador hotu atu simu vassina AstraZeneca tuir instrusaun ami simu husi Australian Therapeutic Goods Administration, DFAT.

2. Kandidatu Traballadores néebé simu ona vassina AstraZeneca ba dala rua, bele mai entrega ona komprovativu vassina (kartaun vassina ho karta Ministeriu Saude nian) iha LSU tuir prosesu iha okos.

3. Se karik imi seidauk vassina, favor konsidera tok ba. Hanesan ita hotu-hotu hatene katak vassina láos obrigatoriu, maibe karik imi hakarak hetan oportunidade atu ba servisu iha Australia, DNEE hakarak enkoraja nafatin atu ba vizita sentru saude ka sentru vassinasaun hodi simu vassina AstraZeneca, tamba ida née sei fó vantagen bóot atu hetan selesaun husi Empregador sira iha futuru.

DNEE kria opsaun rua ba kandidatu sira atu hatama dokumentus komprovativu simu vassina.

OPSAUN 1 – Hatama dokumentus liu husi via online (Opsaun preferidu)

• Traballador scan dokumentu sira iha okos no save ho naran hanesan ami fó ezemplu ba:

1. Kartaun Eleitoral – naranapelido_eleitoral.pdf (exemplu: joaopires_eleitoral.pdf)

2. Kartaun Vassina – pdf (exemplo: anasousa_vassina.pdf)

3. Sertifikadu Vassina husi Ministeriu Saude – naranapelido_MinisteriuSaude.pdf (exemplo: miguelmaia­_MinisteriuSaude.pdf) (Nota: Sertifikadu Ne’ebe hasai husi Ministeriu Saude nia Aplikasaun RSETL ba sira ne’ebe uza Telefone Android no tipu telefone seluk sei fornese husi Ministeriu Saude)

• Anexa file tolu née ba email ida no haruka ba email vasinas.lsu@gmail.com
• Email hotu DNEE simu, sei simu fila fali email ida konfirmado simu ona.
• Iha imi nia email tenki hakerek

1. Naran Kompletu, Data moris no Numeru Referensia SEFOPE nian.

NOTA: Karik imi la simu fila email konfirmadu husi DNEE, favor konfirma se imi hakerek email los no karik kontinua iha problema bele komunika ho DNEE liu husi numeru 78598146.

OPSAUN 2 – Hatama dokumentus direita iha edifisiu DNEE

• Traballador prepara envelope A4 ida no hakerek iha oin: Naran kompleto, Data Moris, Numeru Ref SEFOPE no Municipio original nian
• Iha envelope laran inklui:

1. Kopia koloridu Kartaun Eleitoral

2. Kopia Koloridu Livru Vassina

3. Kopia koloridu Sertifikadu Vassina husi Ministeriu Saude

4. Numeru telefone atual ho email

• Taka envelope metin, no
• Mai hatama iha Kaixa nebe LSU prepara no tau iha Seguransa nia fatin iha DNEE Becora.

 Data limite kompleta dokumentus maka 30 Setembru 2021, ba faze dahuluk (I).

Karik iha pergunta ka duvidas ruma favor kontatu LSU iha numeru telefone 78598146 ka 77757082 ka haruka email diretu ba enquiries.lsu.tl@gmail.com

Husu ba traballador sira tenki respeita regras COVID-19 hanesan uza maskara no halo distansia social, bainhira hatama dokumentus iha DNEE-LSU.

NO avizu ida ne’e foka ba traballador sira ne’ebe tama ona iha sistema Work Ready Pool DNEE nian (la inkui traballador sira ne’ebe tuir teste iha Akademia Policia Comoro Dili iha 2020).

Dili, 15 Julho 2021

Filomeno Soares

Diretor DNEE