Dili, 19 Novembru 2021- Diretór Diresaun Nasionál Empregu Exteriór Filomeno Soreas hamutuk hó reprezentante HRD Korea iha Timor-Leste Mr. Jooyun Yang, hala’o enkontru ho traballadór re-entri na’in tolu-nulu-resin-tolu (33) iha salaun DNEE Bekora.
Traballadór re-entri na’in tolu-nulu-resin-tolu (33) ne’e, kompostu husi área peska na’in sanulu-resin-hitu (17) no área fábrika na’in sanulu-resin-neen (16), ne’ebé naran iha ona entry list, no tuir planu sei aranka ba servisu iha Korea Súl iha loron 14 Dezembru 2021.
Iha enkontru ne’e Diretór Diresaun Nasionál Empregu Exteriór informa kritéria no montante orsamentu ne’ebé kandidatu trablladór sira atu hatama, tanbá montante orsamentu no kritéria la hanesan ona ho uluk.
Kritéria ne’ebé kandidatu sira atu kompleta maka, vasinasaun kontra KOVID-19 kompleta doze daruak, teste médiku no teste PCR KOVID-19, antes traballadór aranka ba Korea Súl tenke halo karantina durante kalan ida, no ba to’o iha korea Súl sei hala’o karantina durante loron sanulu-resin-haat.
Tempu hanesan Diretór ne’e alerta ba kandidatu sira atu bele kuidadu nafatin saude, no hadók aan husi ransu, tanbá antes atu aranka ba Korea Súl sei tuir teste mediku no teste PCR KOVID-19, karik afeta ba moras ruma sei halo kanselamentu hodi halo tratamentu.