Dili, 20 Dezembru 2021- Diretór Diresaun Nasionál Empregu Exteriór Filomeno Soares, hamutuk hó reprezentante HRD Korea iha Timor-Leste Mr. Jooyun Yang hala’o enkontru ho kandidatu traballadór Korea Súl entry list na’in sia-nulu-resin-ida (91) iha salaun DNEE Bekora.

Iha biban ne’e, Diretór Diresaun Nasionál Empregu Exteriór Filomeno Soares hateten, objektivu husi enkontru ne’e atu bele fó hatene kritéria ne’ebé Governu Korea Súl fó, no montante orsamentu ne’ebé kandidatu traballadór sira atu bele prepara, tánbá kritéria no montante orsamentu lá hanesan ona ho uluk mundu sedauk infrenta moras KOVID-19.

Kritéria ne’ebé kandidatu sira atu bele kompleta maka, vasinasaun kontra KOVID-19 kompleta doze da-ruak, teste médiku no teste PCR KOVID-19, antes traballadór aranka ba Korea Súl tenke halo karantina durante kalan ida, no ba to’o iha Korea Súl sei halo tán karantina durante loron sanulu.

Tempu hanesan dirizente ba Diresaun Nasionál Empregu Exteriór ne’e alerta ba kandidatu traballadór sira atu bele kuidadu nafatin sáude, no hadók án husi ransu livre, tánbá antes atu aranka ba Korea Súl sei halo teste médiku hetan moras halo kanselamentu, no ba to’o iha Korea Súl realiza tán teste médiku dala ida, karik afeta moras ruma sei deporta fila mai Timor-Leste.

Entretantu traballadór entry list na’in sia-nulu-resin-ida (91) ne’e, kompostu husi área peskas ema na’in lima-nulu-resin-neen (56), área Fábrika ema na’in tolu-nulu-resin-lima (35) mene hotu, no tuir planu traballadór hirak ne’e sei aranka iha loron 14 Janeiru 2022.