Dili, 17 Novembru 2021- Diretór Diresaun Nasionál Empregu Exteriór DNEE Filomeno Soares hamutuk ho reprezentante HRD Korea iha Timor-Leste Mr. Jooyun Yang, hala’o enkontru ho kandidatu traballadór entry list na’in neen-nulu-resin-lima (65) iha salaun DNEE Bekora.

Objektivu husi inkontru ne’e atu informa kritéria no montante orsamentu ne’ebé kandidatu sira atu bele hatama, nune’e sira bele kompriende hodi labele mosu duvida, tanbá kritéria no montante orsamentu ne’ebé atu hatama la hanesan hó uluk.

Kritéria ne’ebé kandidatu sira atu kompleta maka, vasinasaun kontra KOVID-19 kompleta doze daruak, teste médiku no teste PCR KOVID-19, antes traballadór aranka ba Korea Súl tenke halo karantina durante kalan ida, no ba to’o iha korea Súl sei hala’o karantina durante loron sanulu-resin-haat.

Tanbá ne’e, Diretór ne’e alerta ba kandidatu sira atu bele kuidadu nafatin saude, no prevene án husi ransu, tanbá antes atu aranka ba Korea Súl sei tuir teste mediku no teste PCR KOVID-19, karik afeta ba moras ruma sei halo kanselamentu hodi halo tratamentu.

Entretantu kandidatu traballadór entry list nain neen-nulu-resin-lima (65) ne’e, kompostu husi área peskas na’in tolu-nulu-resin-tolu (33) no área fábrika na’in tolu-nulu-resin-rua (32) mane hotu, no tuir planu sei aranka iha loron 6 Dezembru 2021.